लुम्बिनी प्रदेश सभाको सातौँ अधिवेशन आजदेखि

काठमाडौं । लुम्बिनी प्रदेश सभाको सातौँ हिउँदे अधिवेशन आजदेखि सुरु हुँदैछ । सातौँ अधिवेशनको पहिलो बैठक दिउँसो १ बजे बस्नेछ । 

 बैठकमा सभामुखले प्रदेश प्रमुखको कार्यालयबाट प्राप्त तीनवटा पत्रहरू पढेर सुनाउनेछन्। ती पत्रमा सातौँ अधिवेशन आह्वान सम्बन्धी सूचना, मन्त्रिपरिषद् पुनर्गठनबारे जानकारी र छैटौँ अधिवेशनबाट पारित भई प्रमाणीकरण भएका विधेयकसम्बन्धी पत्र समावेश छन् ।

सभामुखले माननीय सदस्यहरूको उपस्थिति–अनुपस्थितिको विवरण प्रस्तुत गर्नेछन्। त्यसपछि दलका तर्फबाट प्रदेश सभा सदस्यहरूले शुभकामना मन्तव्य राख्ने कार्यक्रम रहने छ । 

हिउँदे अधिवेशनका प्रस्तावित छलफलका लागि जिल्ला सभा तथा जिल्ला समन्वय समिति सञ्चालन सम्बन्धी ऐन, २०७५ संशोधन गर्न बनेको विधेयक र स्थानीय तहका पदाधिकारी तथा सदस्यहरूको सुविधा सम्बन्धी ऐन, २०७६ संशोधन गर्न बनेको विधेयक दर्ता भइसकेका छन् ।

यस्तै, प्रदेश मन्त्रिपरिषद् बैठकबाट थप विधेयकहरू प्रदेशसभामा पेश गर्न स्वीकृति प्रदान गरिएको सचिवालयले जनाएको छ। स्वीकृत विधेयकहरूमा लुम्बिनी प्रज्ञा प्रतिष्ठान स्थापना तथा सञ्चालन गर्न बनेको विधेयक, प्रदेश जीवनाशक विषादी व्यवस्थापन तथा नियमनसम्बन्धी विधेयक र दलित समुदायको अधिकार सुनिश्चित गर्ने विधेयक समावेश छन्।