क्यानडा पठाइदिन्छु भन्दै ठगी गरेको आरोपमा एक महिला पक्राउ
३ चैत २०८२, मङ्गलवार 
स्टार संवाददाता
स्टार संवाददाता 
काठमाडौं । क्यानडा पठाइदिन्छु भन्दै पाँच जनाबाट २७ लाख रुपैयाँ ठगी गरेको आरोपमा काठमाडौंबाट एक महिला पक्राउ परेकी छन् ।
पक्राउ पर्नेमा कञ्चनुरको भीमदत्त नगरपालिका १८ घर भई काठमाडौं महानगरपालिका ९ बस्ने ५१ वर्षीया गीता भण्डारी छिन् । वैदेशिक रोजगारीका लागि आकर्षक तलबको प्रलोभनमा पारी क्यानडा पठाइदिन्छु भन्दै ५ जना पीडितहरूबाट २७ लाख रूपैयाँ लिई सम्पर्कविहीन भएकी उनलाई प्रहरीले काठमाडौंबाटै पक्राउ गरेको हो ।
उनीविरुद्ध पीडितले दिएको उजुरीको आधारमा काठमाडौं उपत्यका अपराध अनुसन्धान कार्यालय टेकुले खोजी गरेको थियो । उनलाई काठमाडौं महानगरपालिका ९ बाट पक्राउ गरिएको प्रहरीले जनाएको छ । उनलाई आवश्यक अनुसन्धान तथा कारवाहीको लागि वैदेशिक रोजगार विभाग ताहाचल पठाइएको छ ।
