वीरगन्ज नाका हुँदै एक खर्ब चार अर्बको पेट्रोलियम पदार्थको आयात

काठमाडौं । चालू आर्थिक वर्षको सात महिनामा वीरगन्ज नाका हुँदै एक खर्ब चार अर्ब ७६ करोड मूल्यबराबरको डिजेल, पेट्रोल, एलपिजी ग्यास, एभिएसन टर्वाइन फ्युल, मट्टीतेल आयात भएको छ ।

गत आवको सात महिनाको तुलनामा चालू आर्थिक वर्षको सोही अवधिमा ८४ करोड बढीको पेट्रोलियम पदार्थ आयात भएको हो । वीरगन्ज भन्सार कार्यालयका सूचना अधिकारी अमित तिवारीले चालू आर्थिक वर्षको पछिल्ला महिनामा पेट्रोलियम पदार्थको आयात र राजस्व दुवैमा वृद्धि भएको बताउनुभयो । गत आर्थिक वर्षको सात महिनाको अवधिमा भने एक खर्ब तीन अर्ब ९२ करोड मूल्यबराबरको पेट्रोलियम पदार्थको आयात भएको थियो । 

कार्यालयका अनुसार चालू आर्थिक वर्षको सात महिनाको अवधिमा सबैखालका पेट्रोलियम पदार्थको आयातबाट ४३ अर्ब ११ करोड राजस्व संकलन भएको छ । गत आर्थिक वर्षको सोही अवधिमा सबैखालको पेट्रोलियम पदार्थको आयातबाट ३८ अर्ब ६५ करोड राजस्व संकलन भएको थियो । चालू आर्थिक वर्षको सात महिनामा ५१ अर्ब ७९ करोडबराबरको पाँच लाख ८१ सात ७९९ किलोलिटर डिजेल आयातबाट २३ अर्ब १० करोड राजस्व संकलन भएको वीरगन्ज भन्सार कार्यालयले जनाएको छ ।

त्यस्तै चालू आर्थिक वर्षको सात महिनामा २२ अर्ब १४ करोड मूल्यबराबरको दुई लाख ५५ हजार ५४२ किलोलिटर पेट्रोल आयात हुँदा १४ अर्ब ४९ करोड राजस्व संकलन भएको छ । चालू आर्थिक वर्षको सोही अवधिमा २० अर्ब ९० करोड मूल्यबराबरको १८ करोड २९ लाख ९४ हजार ६२४ किलोग्राम एलपिजी आयात भएको छ । सो आयात हुँदा  तीन अर्ब ९१ करोड राजस्व संकलन भएको छ ।